20 мая 2026 года ў Палескім дзяржаўным універсітэце адбылося ўрачыстае адкрыццё міжрэгіянальнай спартакіяды для людзей з інваліднасцю "Палескія старты-2026".
Мерапрыемства сабрала ўдзельнікаў з розных рэгіёнаў Брэсцкай вобласці і горада Пінска. "Палескія старты" ўжо сталі добрай традыцыяй, якая аб'ядноўвае людзей, для якіх спорт з'яўляецца крыніцай сілы духу, упэўненасці і імкнення да новых дасягненняў. Урачыстая цырымонія пачалася з прывітальных слоў вядучага і выканання гімна Рэспублікі Беларусь.
Творчую частку цырымоніі ўпрыгожылі выступленні калектыву гімнастыкі і акрабатыкі "Крок за крокам", харэаграфічных калектываў "Лучыкі" і "Апельсін", а таксама арт-праекта "Універсія".
У спартыўнай зале ПалесДУ прайшлі спаборніцтвы спартакіяды, дзе ўдзельнікі прадэманстравалі спрыт, сілу і камандны дух. Каманды прайшлі праз серыю займальных выпрабаванняў: трапнасць у гульні "Снайпер", уважлівасць у "Мінным полі", хуткасць у эстафеце "Змейка", сілу ў перацягванні каната, а таксама спаборнічалі ў боўлінгу, скачках і іншых актыўных гульнях. Капітаны паказалі сваю дакладнасць у конкурсе "Паветраны дартс".
Пасля завяршэння ўсіх этапаў былі падведзены вынікі і вызначаны пераможцы.
- Войдите, чтобы оставлять комментарии
