Штогод 5 чэрвеня ў Беларусі адзначаецца Дзень аховы навакольнага асяроддзя - дзяржаўнае свята, заснаванае Указам Прэзідэнта і прымеркаванае да міжнароднага Сусветнага дня навакольнага асяроддзя, абвешчанага ААН у 1972 годзе. Гэта нагода не толькі адзначыць поспехі краіны ў галіне экалагічнай бяспекі, але і нагадаць аб персанальнай і карпаратыўнай адказнасці за прыроду, ад якой непасрэдна залежыць якасць жыцця, устойлівае развіццё і канкурэнтаздольнасць беларускага бізнесу. Канцэпцыя нацыянальнай бяспекі Рэспублікі Беларусь разглядае экалагічную бяспеку як самастойны від нацыянальнай бяспекі краіны разам з палітычнай, эканамічнай, навукова-тэхналагічнай, сацыяльнай і іншымі.
У чытальнай зале навучальнага корпуса №1 арганізавана кніжна-часопісная выстаўка “Экалагічная бяспека”, на якой прадстаўлена літаратура, якая асвятляе праблемы негатыўнага ўплыву чалавечай дзейнасці на прыроду і аховы навакольнага асяроддзя ад розных забруджванняў. На выстаўцы экспануюцца кнігі па пытаннях экалогіі, рэнавацыі прыродных сістэм, метадалогіі фарміравання мадэлей узаемадзеяння чалавека з навакольным асяроддзем і асновам прыродакарыстання, а таксама выданні па прамысловай, гарадской экалогіі, абароне навакольнага асяроддзя ад шкодных выкідаў, маніторынгу асяроддзя пражывання.
Абарона навакольнага асяроддзя і беражлівыя, адказныя адносіны да прыродных рэсурсаў дадуць магчымасць забяспечыць будучыню ўсяму чалавецтву і захаваць нашу планету, выкарыстоўваючы дасягненні навукі і тэхнікі.
- Войдите, чтобы оставлять комментарии
